Galdetu: Erantzungo dizugu - 17. galdera
17.- Hirigintzako legezkotasunaren gaineko txosten bat (eskakizunak, eraisteko agindua...) hasi zen lurzoruari eta hirigintzari buruzko Legea onartu baino lehen. Zer Lege aplikatu behar da hirigintzako legezkotasuna berrezartzeko prozeduraren faseak izapidetzean (eraisteko agindua, zehapen-prozedura, gauzatze subsidiarioa), 76ko Testu bategina edota 2/2006 lurzoruaren lege berria? Hau da, lege berria baino lehen irekitako hirigintzako legezkotasun-txosten batean zehapen-prozedura bat hasten bada, zer aplikatuko zaizo: 1976ko Lurzoruaren Legeko Testu bateginaren 225. artikulua eta hurrengoak eta Hirigintza Diziplinaren Arautegiko 66. artikulua eta hurrengoak edota lege berriko 225. artikulutik 244.era bitartekoak.
Legeztatze- eta zehatze-prozedurak bateragarriak dira, baina izapideak bereizi egin behar dira (aldi berean egin daitezke, 242. art.). Hala, legeztatzearekin batera izapidetzea hautatuta ere, zehapen-txostena legeztatzearena amaitu ostean ebatzi beharko da; izan ere, litekeena da zehapena aldatzea hirigintza-jardueraren legeztatzeak duen arrakastaren arabera.
Uler daiteke legeztatze-prozedurak, lehengo legediaren arabera hasi bazen, lehengo legediaren bideak eta moduak bete beharko lituzkeela, betiere defendatuta ez dela norbanakoen eskubideen murriztailea, ez-mesedegarria edo zigortzailea. Administrazio-unitateko printzipioak, segurtasun juridikokoak eta legeen atzeraeraginik eza aplikatuko liezazkioke.
Zehapen-prozedurari dagokionez, zehatzeko xedapenen atzeraeragintasunik ezaren printzipioari buruzko EEko 9.3. artikuluari eta 30/1992 Legearen 128. artikuluari jarraiki, aipatu beharra dago hirigintzako arau-haustea egiten den unean indarrean dauden zehatzeko xedapenak ezarri behar direla, xedapen berriek ustezko arau-hausleari eragin mesedegarria egiten diotenean salbu. Bi araudiak alderatuta, oro har, 2/2006ko Legeak ezartzen dituen isunak eta zehapenak larriagoak dira. Prozedurari dagokionez, eta herritarrentzako bermeekin konparatuta, ulertzen dugu, oro har, 1976ko Lurzoruaren Legeak eta Hirigintza Diziplinaren Arautegiko 66. artikuluak eta hurrengoek, 2/1998ko Legearekin osatutakoek, EAEko Administrazio Publikoen zehatzeko ahalari buruzkoek, egun indarrean dagoen 2/2006 Legearen berme berberak dituztela. Hala ere, analisi eta gogoeta orokor hau aztergai dagoen objektu partikularrarekin kontrastatu behar da.
Itzuli