Bilbo, Platinozko Erratzarekin saritua
ATEGRUS® Ingurumena eta Hondakinak Kudeatzeko Elkarte Teknikoak, ISWA International Sustainable Waste Association elkarteari atxikita dagoen erakundeak, Zilarrezko, Urrezko eta Platinozko Erratzen X.Lehiaketa-ko sariak banatu zituen ekainaren 15ean Madrilen.
Horrela, Bilbok Platinozko Erratza lortu zuen ekitaldi hartan. Bestalde, Euskal Herriko hainbat udalerrik maila desberdineko golardoak jaso zituzten, hala nola: Urnietak eta Barakaldok (Zilarrezko Erratzak) eta Donostiak (Platinozko Erratza).
TEM-TECMA 2006 Hirigintza eta Ingurumenaren Nazioarteko Astearen baitan ospatu zen ekitaldia. Izan ere, lehiaketa honen bitartez ATEGRUS® elkarteak hiri zein industria hondakinen kudeaketa ona saritu nahi du. Era berean, ingurumenaren kudeaketa jasangarria bermatzen duten proiektu eta teknologien garapena sustatzen ditu.
Lehiaketari esker, hainbat egitasmo saritu dituzte: hondakinen kudeaketaren hobekuntza, gure hiri eta industriek eragiten dituzten hondakinen garbiketa, aurrerapen teknologikoen sariketa, gure bizi-kalitatea hobetzeko lan egiten duten egitasmoen errekonozimendua eta gure hiri eta industrien jasangarritasuna, esaterako.
Sari-banaketa ekitaldian Julian Uriarte ATEGRUS® elkarteko presidentea, Mª Jesus Villamediana Diez Madrilgo Erkidegoko Ingurugiro Kalitateko zuzendaria eta Maria Valcarce TEM-TECMA aretoko zuzendaria izan ziren, besteak beste.